Kryeministri Rama jep lajmin e mirë

Kryeministri Edi Rama e ka nisur ditën sot duke publikuar pamje nga Bypass i Vlorës. Rama bën të ditur se ky segment i rëndësishëm pritet të hapet këtë sezon turistik.

Në pamjet e publikuara duket se si po vijon procesi i punimeve për të bërë të mundur lehtësimin e trafikut përgjatë sezonit veror kur ka fluks të automjeteve.

“Mirëmëngjes dhe me Bypass-in e Vlorës që pritet të hapet këtë sezon turistik, si një segment i rëndësishëm për qarkullimin e automjeteve, lehtësimin e trafikut dhe për zhvillimin turistik të qytetit bregdetar, ju uroj një ditë të mbarë”, tha Rama.

Bypassi i Vlorës, pritet që të lehtësoje ndjeshëm qarkullimin e automjeteve dhe të ulë trafikun përgjatë sezonit turistik. Kjo vepër infrastrukturore me një gjatësi 29 kilometra nis në fundin jugor të autostradës Levan-Vlorë dhe përfundon në lindje të Orikumit ku bashkohet me rrugën nacionale Orikum-Sarandë. Në projekt është parashikuar ndërtimi i 5 urave, një gjysmë tunel si dhe ndërtimi i mbrojtjes lumore të lumit Dukat. Rruga e re vlerësohet si një ndër segmentet me impaktin më të lartë turistik që do të ndikojë ndjeshëm në lehtësimin e trafikut në qytetin e Vlorës.