Situata në RINAS, Aeroporti “Nënë Tereza” bën njoftimin e RËNDËSISHËM

Aeroporti “Nënë Tereza” njofton se fluturimet e programuara do të nisin ditën e nesërme.

Përmes një njoftimi zyrtar për media, Aeroporti i vetëm në Shqipëri ka reaguar lidhur me situatën e krijuar për shkak të grevës së kontrollorëve, duke thënë se gjatë ditës së sotme do të vijojnë fluturimet humanitare, mjekësore dhe diplomatike.

Ndërsa ditën e nesërme do të nisin të gjitha fluturimet e tjera të programuara, por që për shkak të grevës u bllokuan për rreth 48 orë.

Burime bëjnë me dijse se nga Turqia kanë mbërritur disa kontrollorë që do të zëvendësojnë ata shqiptarë që s’pranojnë të kthehen në punë.

NJOFTIMI I PLOTË:

Nesër në mëngjes rinisin fluturimet

Tirana International Airport njofton se fluturimet e programuara rinisin nesër në mëngjes, ndërkohë që sot do të kryhen operimet për fluturimet humanitare, mjekësore dhe diplomatike. Sipas njoftimeve zyrtare të shtetit shqiptar, fluturimet e programuara rifillojnë nesër në mëngjes, më 9 Prill 2021.

Ende nuk ka një orë të saktë për rifillimin e nesërm të fluturimeve. Sapo ta kemi si njoftim, do ta lajmërojmë menjëherë.

Pasagjerët e flydubai që kanë prerë biletën për në Dubai dhe e kanë fluturimin ditën e sotme, i bëjmë me dije ata dhe operatorët turistikë se udhëtimi do të kryhet nga nga aeroporti i Podgoricës dhe deri atje do të transportohen me autobuzë. Janë të lutur të paraqiten brenda terminalit të TIA-s për dhënien e dokumentacionit të nevojshëm për këtë udhëtim.

Njoftojmë gjithashtu se pasagjerët e itinerarit Dubai – Tiranë po me flydubai, se avioni do të ulet në aeroportin e Podgoricës sot në mbrëmje, me një parashikim 18.30 orë lokale, kështu që operatorët turistikë janë të lutur të kujdesen për transportin e tyre nga Podgorica në Tiranë me autobuzë.

Aeroporti Ndërkombëtar i Tiranës mbetet në shërbim të pasagjerëve dhe të çdo informacioni të saktë që është i vlefshëm për publikun.

Për çdo të dhënë tjetër, ju informojmë sërish.

Ju faleminderit për bashkëpunimin,

Tirana International Airport