Beteja kundër COVID, Rama u jep ‘ultimatum’ bizneseve: Mos ua hapni derën …

Kryeministri Edi Rama nga Rinasi është pyetur për gjobat që kanë marrë politikanët pasi kanë organizuar takime me mbi 10 persona.

Rama tha se fajin të parët e kanë ata që u hapin politikanëve dyert e lokalit, pasi në fund të ditës ata gjobiten, madje mund t’ju mbyllet edhe biznesi.

Sipas Ramës, është fatkeqësi që i pari që jep shembull negativ është Presidenti Ilir Meta.

Pyetje: Ju e keni cilësuar si kriminale mbledhjen e politikanëve në ambiente të mbyllura, janë vënë gjoba, mirëpo takimet vijojnë. A mendoni se duhet të ashpërsohet masa ndaj këtyre politikanëve?

Rama: Unë mendoj që ata të cilët ua hapin dyert e lokaleve këtyre politikanëve, nuk duhet t’i hapin dyert se janë ata që paguajnë, që dëmtohen që rrëzikojnë t’i mbyllet biznesi fare. Kur mendon që presidenti, babai i gjithë kësaj familje, rojtari i të gjitha palëve, garanti i shëndetit kushtetues, është i pari që jep shembullin katastrofik, kjo është fatkeqësi. Në djall vafshin të gjitha. Personalisht nuk bëj në asnjë moment kapërcime të kësaj vije. Se di si mund të realizohet në kushtet e kësaj hapësire shumë të ngushtë njerëzlliku, që forcat politike të merren vesh se çfarë dhe si do ja bëjmë deri në 25 prill. Se çdo shtrëngim masash do interpretohet si diktaturë e Ramës për të kufizuar mundësitë e opozitës. Për masa të reja më shtrënguese duhet pyetur ekspertët.