SPAK e BKH të hapin dosjet e Gërdecit, 21 janarit dhe Rrugës së Kombit

Ngjarjet si 21 Janari, Gërdeci, etj kanë treguar se nuk kanë qenë asnjëherë të lehta për t’u zbardhur deri më tani, edhe pse këto dosje të bujshme janë tepër sensitive dhe qytetarët presin që ato të hetohen. Por pa as më të voglin dyshim, sot falë procesit të reformës në drejtësi, e sidomos me ngritjen e SPAK e BKH, drejtësia për këto dosje është më afër dhe marrja e drejtësisë është një opsion shumë më realist seç ishte. Të paktën kështu mendon ish-kreu i Shërbimit Informativ Shtetëror, Fatos Klosi. Ky i fundit gjatë një prononcimi për gazetën SOT, deklaroi dje se dosjet e vjetra duhet të jenë në axhendën e SPAK dhe BKH, ndërsa theksoi se ka ardhur koha që prokurorët duhet të guxojnë dhe të hapen 21 Janari apo Gërdeci, pavarësisht presioneve dhe pengesave që mund t’ju dalin rrugës.

Sipas zotit Klosi, vetëm nëse hapen dosjet e bujshme atëherë do të tregohet se reforma në drejtësi është e vërtetë. “Dosjet e bujshme janë tepër sensitive dhe mendoj se ka ardhur koha që të hapen. Por përtej 21 Janarit, Gërdecit apo aferës së rrugës Durrës-Kukës, mendoj se ka të tjera dosje që duhen hapur që janë të këtij niveli. Shiko populli normalisht që po pret që tre dosjet që ju përmendët janë kryesore dhe ka ardhur koha që ato të hapen, pasi me ngritjen e SPAK dhe BKH, por edhe futjes në shina të gjithë sistemit të drejtësisë falë reformës në drejtësi, është krijuar një klimë besimi se do të vendoset drejtësi. Kështu që populli më shumë do ta ndiejë nëse vërtet është bërë një reformë në drejtësi, vetëm nga fakti nëse drejtësia e re do të jetë kurajoze, e zonja dhe që t’ju hyjë me themel këtyre dosjeve dhe gjërave të mëdha.

Pra, drejtësi e re duhet të hapë dosjet e bujshme dhe të vendosë pikat mbi (I). Dhe nga kjo pikëpamje kur të gjithë presin, edhe unë pres që dosjet e mëdha të hapen”, deklaroi Klosi për gazetën SOT. Duke komentuar faktin se a do të guxojnë Struktura e Posaçme Kundër Korrupsionit dhe Krimit të Organizuar dhe Byroja Kombëtare e Hetimit për të hapur dosjet e vjetra të bujshme, ish-kreu i Shërbimit Informativ Shtetëror, Fatos Klosi, u shpreh dje se kjo gjë është plotësisht e realizueshme. Në këtë kontekst, zoti Klosi theksoi se rol kyç në drejtësinë e re kanë amerikanët, ndërsa shtoi se BKH do të asistohet nga prokurorë të SHBA, që sipas tij, do t’i japin grint çuarjes përpara të luftës kundër korrupsionit dhe krimit të organizuar.

Madje ish-kreu i SHISH, duke iu referuar drejtësisë së re u shpreh se ka ardhur koha që t’i jepet fund pandëshkueshmërisë. “Sa i takon guximit që do të ketë Struktura e Posaçme Kundër Korrupsionit dhe Krimit të Organizuar dhe Byrosë Kombëtare se a do t’i shkojnë deri në fund hetimeve dhe çuarjes para drejtësisë së autorëve dhe shkaktarëve të dosjeve të bujshme, mendoj se po. Unë nuk mund të them se besoj se SPAK dhe BKH do të zbardhin dosjet e bujshme, por shpresoj se ato do ta bëjnë këtë gjë në mënyrën më objektive të mundshme. Kështu që, duke qenë se unë kam shpresë dhe për faktin që gjithë kjo punë që u bë me reformën në drejtësi, mendoj se do të ketë pasoja për ata që janë përfshirë në korrupsion dhe krime. Aq më tepër që BKH do të asistohet edhe nga prokurorë amerikanë dhe të gjitha këto bashkë më shtyjnë që unë të mendoj dhe shpresoj që drejtësia e re do të lëvizë dhe do të vendosë drejtësinë në vend për të gjitha dosjet e bujshme”, nënvizoi ish-kreu i Shërbimit Informativ Shtetëror, Fatos Klosi.